Isa 64 | NdeIBE | STEP | Awu, sengathi ungaqhekeza amazulu wehlele phansi ukuba izintaba zinyikinyeke phambi kwakho!

Isaiah 64

1 Awu, sengathi ungaqhekeza amazulu wehlele phansi ukuba izintaba zinyikinyeke phambi kwakho!

2 Njengalapho umlilo utshisa incwathi wenze amanzi abile, yehlela phansi ukuba wenze ibizo lakho lazakale ezitheni zakho, wenze lezizwe zithuthumele phambi kwakho.

3 Ngoba wathi usenza izinto ezesabekayo esasingazilindelanga, wehlela phansi, izintaba zathuthumela phambi kwakho.

4 Kusukela endulo kakho owezwayo, akulandlebe eyabambisisayo, akulalihlo elabona omunye uNkulunkulu ngaphandle kwakho, osebenzela labo abathembe kuye.

5 Uyeza ukuba usize labo abenza ukulunga ngokuthaba, abazikhumbulayo izindlela zakho. Kodwa lapho saqhubeka sisona kubo wathukuthela. Pho singasindiswa kanjani na?

6 Sonke sesaba njengomuntu ongcolileyo, lemisebenzi yethu yokulunga yonke injengezidwedwe ezingcolileyo, sonke siyabuna njengehlamvu, lanjengomoya izono zethu zisiphephulela khatshana.

7 Kakho okhuleka ebizweni lakho lozamayo ukubambelela kuwe, ngoba ubuso bakho ubufihlile kithi wasenza sacikizeka ngenxa yezono zethu.

8 Ikanti, O Jehova, wena unguBaba wethu. Thina silibumba, wena ungumbumbi; Sonke singumsebenzi wezandla zakho.

9 Ungathukutheli wedlulise, hawu Jehova; izono zethu ungazikhumbuli kokuphela. Hawu, ake usikhangele, siyakhuleka, ngoba sonke singabantu bakho.

10 Amadolobho akho angcwele aseyinkangala; leZiyoni isiyinkangala, iJerusalema isiyincithakalo.

11 Ithempeli lethu elingcwele njalo elikhazimulayo lapho obaba ababekudumisela khona, litshiswe ngomlilo, njalo konke okwakuligugu kithi sekungamanxiwa.

12 Emva kwakho konke lokhu, hawu Jehova, uzazithinta na? Uzazithulela, usijezise ngokudlulisileyo na?